ബഹ്‌റൈൻ കേരളീയ സമാജം എന്റർടെയിൻമെന്റ് വിഭാഗത്തിന്റെ നേതൃത്വത്തിൽ വർഷംതോറും നടത്തിവരാറുള്ള യുവത്വത്തെ ആഘോഷിക്കുന്ന ഡാൻസ്പ-മ്യൂസിക് പരിപാടി, ധൂംധലാക്കയുടെ 2024 പതിപ്പ്  ധൂംധലാക്ക സീസൺ 6 ഡിസംബർ 17 ന് നടക്കും. സമാജം ഡി. ജെ. ഹാളിൽ ഓണാഘോഷ പരിപാടികൾക്കിടെ, എം. വിൻസെന്റ് എം. എൽ. എ. ധൂംധലാക്ക സീസൺ 6 ന്റെ ഫസ്റ്റ് ലുക്ക് പോസ്റ്റർ പ്രകാശനം ചെയ്തിരുന്നു. സമാജം പ്രസിഡന്റ് പി വി രാധാകൃഷ്ണ പിള്ള, ജനറൽ സെക്രട്ടറി വർഗ്ഗീസ് കാരക്കൽ, ധൂംധലാക്ക കൺവീനർ ദേവൻ പാലോട്, എക്സിക്യൂട്ടീവ് കമ്മറ്റിയംഗങ്ങൾ, ധൂംധലാക്ക കമ്മറ്റി അംഗങ്ങൾ എന്നിവർ സന്നിഹിതരായിരുന്നു.

മുൻ വർഷങ്ങളിൽ വൻപിച്ച ജനപ്രീതി നേടിയ പരിപാടി ഈ വർഷം ബഹ്‌റൈൻ ദേശീയദിനത്തോടനുബന്ധിച്ചു ഡിസംബർ 17 നാണു നടക്കുക. രണ്ടര മണിക്കൂർ ദൈർഘ്യത്തിൽ നോൺസ്റ്റോപ് ആയി ഒരുക്കുന്ന പരിപാടിയിൽ ഇന്ത്യയിൽ നിന്നും ബഹ്റൈനിൽ നിന്നുമുള്ള അനുഗ്രഹീത ഡാൻസ്-മ്യൂസിക്  കലാകാരന്മാരുടെ വിവിധ ട്രൂപ്പുകൾ പങ്കെടുക്കും

മനാമ:ബഹ്‌റൈൻ കേരളീയ സമാജത്തിലെ ഈ വർഷത്തെ വിദ്യാരംഭം വിജയദശമി ദിനമായ ഒക്ടോബർ 13 ഞായറാഴ്ച രാവിലെ 5.30ന് ആരംഭിക്കുമെന്ന് പ്രസിഡന്റ് പി.വി.രാധാകൃഷ്ണപിള്ളയും ജനറൽ സെക്രട്ടറി വർഗ്ഗീസ് കാരക്കലും വാർത്താക്കുറിപ്പിൽ അറിയിച്ചു
പ്രമുഖ പോലീസ് ഓഫീസറും കലാകാരനുമായ എസ്.ശ്രീജിത്ത് ഐ.പി.എസ് ആണ് കുരുന്നുകൾക്ക് ആദ്യാക്ഷരം കുറിക്കാനായി എത്തിച്ചേരുന്നത്

സാധാരണ കുടുംബത്തിൽ ജനിച്ച് കഠിന പ്രയത്നം കൊണ്ട് സിവിൽ സർവ്വീസ് പരീക്ഷ വിജയിച്ച് ഔദ്യോഗിക രംഗത്ത് എത്തിച്ചേർന്ന പോലീസ് ഉദ്യോഗസ്ഥനാണ് കോഴിക്കോട് എരഞ്ഞിപ്പാലം സ്വദേശിയായ
 എസ്.ശ്രീജിത്ത്.

കോഴിക്കോട് ചേളന്നൂർ ശ്രീനാരായണ കോളേജിൽ നിന്ന് ബിഎസ്‌സി മാത്തമാറ്റിക്‌സിൽ ബിരുദം നേടിയതിനു ശേഷം 1990-1991 കാലയളവിൽ ആകാശവാണിയിലും
1991 മുതൽ1996 വരെ കസ്റ്റംസിലും സേവനമനുഷ്ഠിച്ചതിനു ശേഷം
1996 ബാച്ചിൽ  (കേരള കേഡർ)
 ഐപിഎസ് നേടി,1998-ൽ കുന്നംകുളം എഎസ്പിയായി ഐപിഎസ് ജീവിതം ആരംഭിച്ചു
പിന്നീട് വടകര എഎസ്പിയായും തലശേരി എഎസ്പിയായും ചുമതലയേറ്റു

2000-ൽ പോലീസ് സൂപ്രണ്ടായി സ്ഥാനക്കയറ്റം ലഭിച്ച് കേരള സായുധ പോലീസിൽ കമാൻഡൻ്റായി സേവനമനുഷ്ഠിച്ചു.
 ബറ്റാലിയൻ-4, മലബാർ സ്‌പെഷ്യൽ പോലീസ്,
ക്രൈംബ്രാഞ്ച്, ഇൻ്റലിജൻസ്, ടെലികമ്മ്യൂണിക്കേഷൻ തുടങ്ങിയവയിൽ പോലീസ് സൂപ്രണ്ടായി സേവനമനുഷ്ഠിച്ചിട്ടുണ്ട്
2010-ൽ ക്രൈംബ്രാഞ്ചിൽ ഡെപ്യൂട്ടി ഇൻസ്പെക്ടർ ജനറൽ ഓഫ് പോലീസ് (ഡിഐജി) ആയി സ്ഥാനക്കയറ്റം ലഭിച്ചു.

പിന്നീട് കണ്ണൂർ റേഞ്ച് ഡിഐജി, കേരള പൊലീസ് അക്കാദമി (കെഇപിഎ) ജോയിൻ്റ് ഡയറക്ടർ, കേരള സംസ്ഥാന മനുഷ്യാവകാശ കമ്മിഷനിൽ ഡിഐജി. എന്നീ നിലകളിലും പ്രവർത്തിച്ചു.

2014-ൽ ഇൻസ്പെക്ടർ ജനറൽ ഓഫ് പോലീസ് (ഐജിപി) ആയി സ്ഥാനക്കയറ്റം ലഭിക്കുകയും
പിന്നീട് ക്രൈംബ്രാഞ്ചിലും കൊച്ചി റേഞ്ചിലും ഐജിപിയായി ചുമതലയേൽക്കുകയും ചെയ്തു.

നിലവിൽ ഐജിപി-ക്രൈംസ് (സൗത്ത് സോൺ) എന്ന പദവി വഹിക്കുന്നു
മനുഷ്യക്കടത്ത് വിരുദ്ധ യൂണിറ്റിൻ്റെ സംസ്ഥാന നോഡൽ ഓഫീസർ, നിർഭയ, ഹൈക്കോടതി ജുവനൈൽ ജസ്റ്റിസ് കമ്മിറ്റി തുടങ്ങിയ നിരവധി പ്രോജക്റ്റുകളിൽ അംഗം എന്നീ നിലകളും വഹിക്കുന്നു

പോലീസ് സേനയിൽ അംഗമായ ഗായകൻ എന്ന നിലയിൽ
നിരവധി സംഗീത പരിപാടികളിലൂടെ  ശ്രദ്ധ നേടികയും മഞ്ചിത്ത് ദിവാകർ കഥയെഴുതി സംവിധാനം ചെയ്ത 'ദി സ്പോയിൽസ്' എന്ന ചിത്രത്തിനു വേണ്ടി പിന്നണിഗാന രംഗത്തും ചുവടുറപ്പിച്ചിട്ടുള്ള അദ്ദേഹം പ്രശസ്ത ഗായകൻ പന്തളം ബാലൻ്റെ ശിക്ഷണത്തിൽ ശാസ്ത്രീയ സംഗീതവും അഭ്യസിച്ചുവരുന്നു.

വിദ്യാരംഭത്തിനു വേണ്ടിയുള്ള രജിസ്‌ട്രേഷൻ സമാജത്തിൽ ആരംഭിച്ചതായി സംഘാടകർ അറിയിച്ചുകൂടുതൽ വിവരങ്ങൾക്ക്
 വിനയചന്ദ്രൻ നായർ (39215128)) രജിത അനി( 3804 4694 )എന്നിവരെ വിളിക്കാവുന്നതാണ്.

ബഹ്‌റൈൻ കേരളീയ സമാജം കുടുംബാംഗങ്ങളുടെ കലാ-സാംസ്‌കാരിക-സാഹിത്യ മാമാങ്കമായ കേരളോത്സവസത്തിന് പുതിയ ലോഗോ കണ്ടെത്തുന്നതിന്റെ ഭാഗമായി നടത്തിയ ലോഗോ ഡിസൈൻ മത്സര വിജയിയെ പ്രഖ്യാപിച്ചു. സെപ്റ്റംബർ 20 ന് വെള്ളിയാഴ്ച നടന്ന ഓണാഘോഷ പരിപാടികൾക്കിടയിലാണ് മത്സര വിജയിയെ പ്രഖ്യാപിച്ചത്. സമാജം പ്രസിഡന്റ് ലോഗോ അനാവരണം ചെയ്തു. ജനറൽ സെക്രട്ടറി വർഗീസ് കാരക്കൽ, കേരളോത്സവം 2024 എക്സ് ഒഫീഷ്യോ വിനയചന്ദ്രൻ നായർ, മറ്റു എക്സിക്യൂട്ടീവ് കമ്മറ്റി അംഗങ്ങൾ, കേരളോത്സവം 2024

 ജനറൽ കൺവീനർ ആഷ്ലി കുര്യൻ മഞ്ഞില, ജോയിന്റ് കൺവീനർമാരായ വിപിൻ മോഹൻ, ശ്രീവിദ്യ വിനോദ്, സിജി ബിനു എന്നിവർ സന്നിഹിതരായിരുന്നു.

ആവേശകരമായ പ്രതികരണം ലഭിച്ച മത്സരത്തിൽ, വിവിധ രാജ്യങ്ങളിലുള്ള മലയാളികളിൽ നിന്നും അൻപത്തൊന്നു എൻട്രികളാണ് ലഭിച്ചത്. സന്തോഷ് കൂനൻ, സഞ്ജയ് കൂനൻ എന്നിവർ വിധികർത്താക്കളായ വിദഗ്ധ പാനലാണ് കേരളോത്സവത്തിന്റെ അന്തസത്ത ഉൾകൊള്ളുന്ന മികച്ച ലോഗോ തിരഞ്ഞെടുത്തത്. കോഴിക്കോട് കല്ലായി സ്വദേശിയും 30 വർഷത്തോളമായി ബഹ്‌റൈനിൽ ആർട് ആൻഡ് ഗ്രാഫിക് ഡിസൈനിങ് രംഗത്ത് ജോലിചെയ്യുന്ന വ്യക്തിയുമായ സമീർ കെ. പിയാണ് മത്സര വിജയി. വിജയിക്ക് സമ്മാനത്തുകയായ 150 അമേരിക്കൻ ഡോളർ കേരളോത്സവ വേദിയിൽ നൽകുമെന്ന് സംഘാടകർ അറിയിച്ചു. ഒരുമാസത്തോളം നീണ്ടുനിൽക്കുന്ന കേരളോത്സവ പരിപാടികൾ നവംബർ മാസത്തിൽ ആരംഭിക്കാനാണ് പദ്ധതി.

ശ്രാവണം 2024 ഓണാഘോഷങ്ങളുടെ ഭാഗമായുള്ള വിവിധങ്ങളായ മത്സരങ്ങൾ സമാജത്തിൽ തുടരുന്നു. ഇന്നലെ, 18 ന് വൈകീട്ട് ഇന്ത്യൻ പാരമ്പര്യ വസ്ത്രങ്ങളുടെ മത്സരം സമാജം ഡി. ജെ. ഹാളിൽ വച്ച് നടന്നു. വൈവിധ്യങ്ങൾക്കു പേരുകേട്ട  ഇന്ത്യൻ വസ്ത്രങ്ങളും വസ്ത്രധാരണ ശൈലികളും അവതരിപ്പിക്കപ്പെട്ട മത്സരത്തിൽ ജുഗ്‌നി, സിനി ഗ്രേപ്സ്, റോക്കിങ് മറാത്താ എന്നീ ടീമുകൾ യഥാക്രമം ഒന്നും രണ്ടും മൂന്നും സ്ഥാനങ്ങൾ കരസ്ഥമാക്കി.

തിങ്കളാഴ്ച, 16 ന് നടന്ന സിനിമാറ്റിക് ഡാൻസ് മത്സരങ്ങൾ കാണികളുടെ കയ്യടി നേടി. ആവേശകരമായ മത്സരത്തിൽ പ്രിസംബ്ലിസ്സ്, ഡാസ്‌ലിംഗ് സ്റ്റാർസ്, തരംഗ് ആർട്സ് എന്നീ ടീമുകൾ ഒന്നും, രണ്ടും, മൂന്നും സ്ഥാനങ്ങൾ കരസ്ഥമാക്കി. അസ്ത്ര ബഹ്‌റൈൻ ടീം പ്രോത്സാഹന സമ്മാനത്തിനർഹരായി.

ഇന്നലെ, 17 ന് നടന്ന  ഓണപ്പാട്ട് മത്സരത്തിൽ, ജൂനിയർ, സീനിയർ വിഭാഗങ്ങളിലായി പതിനാറു ടീമുകൾ പങ്കെടുത്തു. പ്രശസ്ത പിന്നണി ഗായകൻ പന്തളം ബാലൻ, രാധാകൃഷ്ണൻ നായർ, പാർവ്വതി മേനോൻ എന്നിവർ വിധികർത്താക്കളായിരുന്നു. ജൂനിയർ വിഭാഗത്തിൽ ബി. കെ. എസ്. ലൈബ്രറി, ഇഷ ആഷിഖ് & ടീം, പ്രതിഭ സ്വരലയ ജൂനിയർ എന്നിവർ യഥാക്രമം ഒന്നും രണ്ടും മൂന്നും സ്ഥാനങ്ങൾ കരസ്ഥമാക്കിയപ്പോൾ സീനിയർ വിഭാഗത്തിൽ ബി. കെ. എസ്. സാഹിത്യ വേദി, ബി. കെ. എസ്. വനിതാ വേദി, പ്രതിഭ സ്വരലയ സീനിയർ എന്നീ ടീമുകൾ യഥാക്രമം ഒന്നും രണ്ടും മൂന്നും സ്ഥാനങ്ങൾ കരസ്ഥമാക്കി. അന്നേ  ദിവസം സമാജത്തിന്റെ മ്യൂസിക് ക്ലബ്ബിന്റെ പുതിയ ലോഗോ പ്രകാശനം സമാജം പ്രസിഡന്റ് പി. വി. രാധാകൃഷ്ണ പിള്ള നിർവ്വഹിച്ചു. ജനറൽ സെക്രെട്ടറി വർഗ്ഗീസ് കാരക്കൽ, എന്റർടൈൻമെൻറ് സെക്രട്ടറി റിയാസ്മ്യൂ, സിക് ക്ലബ് കൺവീനർ ശ്രീജിത്ത് ഫെറോക്ക് എന്നിവർ സന്നിഹിതരായിരുന്നു.

ശ്രാവണം 2024 ഓണാഘോഷങ്ങളുടെ ഭാഗമായുള്ള പ്രശസ്തരുടെ സം

ഗീത നിശകൾ വ്യാഴാഴ്ചയും വെള്ളിയാഴ്ചയുമായി സമാജത്തിൽ അരങ്ങേറും. അനുബന്ധ പൊതുയോഗങ്ങളിൽ വിശിഷ്ട വ്യക്തിത്വങ്ങൾ പങ്കെടുക്കും.

വ്യാഴാഴ്ച്ച വൈകീട്ട് 8 മണിക്ക് ആരംഭിക്കുന്ന പരിപാടികളുടെ ഭാഗമായുള്ള പൊതുയോഗത്തിൽ എം. വിൻസെന്റ് എം. എൽ. എ. മുഖ്യാതിഥിയായിരിക്കും. പ്രശസ്ത പിന്നണി ഗായകരായ  രാധാകൃഷ്ണൻ നായർ,പന്തളം ബാലൻ , തേക്കടി രാജൻ ,രാജലക്ഷ്മി എന്നീവരുടെ ഗാനമേള ഉണ്ടായിരിക്കും.

വെള്ളിയാഴ്ച വൈകീട്ട് 7.30 ന് ആരംഭിക്കുന്ന പരിപാടികളിൽ തെന്നിന്ധ്യയുടെ വാനമ്പാടി കെ. എസ്. ചിത്രയുടെ സംഗീത നിശയാണ് മുഖ്യ ആകർഷണം. പ്രശസ്ത പിന്നണി ഗായകരായ മധുബാലകൃഷ്ണൻ, നിഷാദ്, അനാമിക എന്നിവരും സംഗീത വിരുന്നിന്റെ ഭാഗമാകും. അന്ന് നടക്കുന്ന പൊതുസമ്മേളനത്തിൽ ഇന്ത്യൻ സ്ഥാനപതി വിനോദ് ജേക്കബ് മുഖ്യാതിഥിയാകും. ചടങ്ങിൽ വച്ച് ബി. കെ. എസ്. കഥാകുലപതി പുരസ്കാരം പ്രശസ്ത എഴുത്തുകാരൻ ടി. പദ്മനാഭന് സമ്മാനിക്കും.

തുടരുന്ന ഓണാഘോഷങ്ങളുടെ ഭാഗമാകാൻ ഏവരെയും സ്വാഗതം ചെയ്യുന്നതായി സമാജം ഭാരവാഹികൾ അറിയിച്ചു. ഈ മാസം 27ന് പഴയിടം മോഹനൻ നമ്പൂതിരിയുടെ പാചകത്തിൽ ഒരുങ്ങുന്ന ഓണസദ്യയോടെയാണ് ഒരു മാസം നീണ്ടു നിൽക്കുന്ന സമാജം ഓണാഘോഷങ്ങൾക്ക് തിരശീല വീഴുക. സദ്യ കൂപ്പണുകൾ സമാജം ഓഫീസിൽ നിന്നും ലഭ്യമാണ്.

ബഹ്‌റൈൻ കേരളീയ സമാജത്തിൽ തുടരുന്ന ഓണാഘോഷങ്ങളുടെ ഭാഗമായി തിരുവോണദിനം നടന്ന പരിപാടിയിൽ, കേരള ഗതാഗത വകുപ്പ് മന്ത്രി കെ. ബി. ഗണേഷ്കുമാർ മുഖ്യാതിഥിയായി പങ്കെടുത്തു. സമാജം ജനറൽ സെക്രെട്ടറി വർഗീസ് കാരക്കൽ സ്വാഗതം ആശംസിച്ചു. യോഗാധ്യക്ഷനായിരുന്ന സമാജം പ്രസിഡന്റ് പി. വി. രാധാകൃഷ്ണപിള്ള മന്ത്രിയെന്നുള്ള നിലയിൽ ഗണേഷ് കുമാർ ദീർഘവീക്ഷണത്തോടെ ചെയ്തുകൊണ്ടിരിക്കുന്ന പരിഷ്‌കാരങ്ങൾ എണ്ണിപറഞ്ഞു അഭിനന്ദനം അറിയിച്ചു. തിരുവോണ ദിനം സമാജം കുടുംബാങ്ങളുടെയും മലയാളി സമൂഹത്തിന്റെയും കൂടെ ചിലവഴിക്കാൻ അദ്ദേഹം കാണിച്ച മഹാമനസ്കതയും രാധാകൃഷ്ണപിള്ള അഭിനന്ദിച്ചു.

സദസ്സിനെ അഭിസംബോധന ചെയ്തു സംസാരിച്ച മന്ത്രി, ലോകത്തിലെ തന്നെ ഏറ്റവും വലുതും നീണ്ടുനിൽക്കുന്നതുമായ ഓണാഘോഷം സംഘടിപ്പിക്കുന്ന ബഹ്‌റൈൻ കേരളീയ സമാജത്തെ അഭിനന്ദിച്ചു. തിരുവോണം ഇത്രയും ഊർജ്‌ജസ്വലരായ സമൂഹത്തോടൊപ്പം ആഘോഷിക്കാൻ സാധിച്ചതിലുള്ള സന്തോഷവറും അദ്ദേഹം പ്രകടിപ്പിച്ചു. തലേന്ന് താൻ സാക്ഷിയായി സമാജത്തിൽ അവതരിപ്പിക്കപ്പെട്ട മെഗാ തിരുവാതിരയേയും അനുബന്ധ നൃത്ത ശില്പങ്ങളെയും പറ്റിയും അദ്ദേഹം വാചാലനായി. അതിൽ പങ്കെടുത്ത കുരുന്നുകളെയും വനിതകളെയും അദ്ദേഹം അഭിനന്ദിച്ചു.

പ്രവാസി മലയാളികൾ ചുരുങ്ങിയ അവധിക്കു നാട്ടിൽ എത്തുമ്പോൾ ഡ്രൈവിംഗ് ലൈസൻസിന് തിയ്യതി കിട്ടാനുള്ള പ്രയാസം ചൂണ്ടികാട്ടിയപ്പോൾ ഞൊടിയിടയിൽ പരിഹാരം അവതരിപ്പിച്ചു അദ്ദേഹം ഏവരെയും ഞെട്ടിച്ചു. പ്രാവാസികൾക്ക് അഞ്ചു ദിവസത്തിനുള്ളിൽ ഡ്രൈവിംഗ് ടെസ്റ്റ് ഡേറ്റ് നൽകാനുള്ള സംവിധാനം അദ്ദേഹം വേദിയിൽ പ്രഖ്യാപിക്കുകയും ചെയ്തു. കയ്യടികളോടെയാണ് സദസ്സ് പ്രഖ്യാപനത്തെ സ്വീകരിച്ചത്. നാല്പതോളം ഫാസ്റ്റ് പാസഞ്ചർ ബസ്സുകൾ എയർകണ്ടീഷൻ സംവിധാനത്തോടെ ആരംഭിക്കുന്നതും, മികച്ച സൗകര്യങ്ങളോടെ ബസ് വെയ്റ്റിംഗ് ഏരിയകൾ ആരംഭിക്കുന്നതും, ദീർഘദൂര സർവീസുകളിൽ ബസ് റൂട്ടിൽ യാത്രക്കാരനു സൗകര്യപ്പെടുന്ന സ്ഥലത്തു നിന്നും ലൊക്കേഷൻ ഷെയർ ചെയ്യുന്ന യാത്രക്കാരനെ കയറ്റുന്ന രീതി, കടന്നുപോകുന്ന ബസ്സിൽ സീറ്റുണ്ടോ എന്ന് മൊബൈൽ ആപ്പ് വഴി അറിയാനുള്ള സംവിധാനം തുടങ്ങി ഒരു പിടി പുതിയ നടപടികളാണ് കെ എസ് ആർ ടി സി നവീകരണവുമായി ബന്ധപെട്ടു അദ്ദേഹം പങ്കുവച്ചത്. ശ്രാവണം ജനറൽ കൺവീനർ വർഗീസ് ജോർജ്, സമാജം ട്രഷറർ ദേവദാസ് കുന്നത്ത്‌ എന്നിവർ സന്നിഹിതരായിരുന്ന യോഗത്തിൽ വൈസ് പ്രസിഡന്റ് ദിലീഷ്‌കുമാർ നന്ദി പറഞ്ഞു. തുടർന്ന് യുവാക്കളുടെ ഹരമായ താമരശ്ശേരി ചുരം ബാൻഡിന്റെ സംഗീത നിശ അരങ്ങേറി